Stedtlischiiisser

Schnitzelbänke siehe unten !

Schnitzelbänk 2011

1 Revolution

Ganz Afrika tuet rebelliere.
Despote tüe demissioniere.
S Volk wott sich jetz zivilisiere
Und d Korruption eliminiere.

Dr Gbagbo wehrt sich wie ne More,
Doch är muess go – d Wahl isch verlore!
Dr Mubarak goht über Liiche
Und het glich schliesslech müesse wiiche.

Vo Tunis flüchtet dr Ben Ali.
Si Frau isch schints so ne Brutali.
Bi sovil Vorbild cha s nümm lang ga
Und z Gränche lüpft s dr Boris Banga!

(Melodie: Hansjakobli + Babettli)

2 Tatort

„Hauptwach, Weibu, halbi zwöi!
So so. Alarm. Vogt-Schild-Gebäu.“

„Meier drü vo Weibu zwo:
Alarm. Vogt-Schild. Chasch Du schnäll go?“
„Um die Zit?! - Weibu, du Banause!
Jetz ha n i Schinkebrötli-Pause!
Solang i s Brötli nid ha gfrässe
Chasch e Alarm dört grad vergässe!“

„Hauptwach, Weibu, zäh vor zwöi!
Dir gseht, dass die ne Party hei?!
Jö dir: Au wenn s euch d Närve raubt:
Bis am zwöi isch das erlaubt.
Was tüe si? D Möbel zäme schlo?
D Versicherig, die zahlt das scho!“

„Hauptwach, Weibu, viertel ab!
So, si decke s Dach jetz ab?
Dr Hueber tuet s gärn wider decke.
Dir, loset: Tüet mi nid gäng wecke!
Was söll das heisse: Nid abwiegle?
S si ömu gwüss nid mini Ziegle!
Was? Was i miech, wenn eine deali? –
Gar nüt. Mir chöi jo nid Swahili.

„Hauptwach, zwänzg vor. Was für Fründe?
Aha, si tüe jetz s Hus azünde.
Verzellet das em Allema,
Dä isch lut Plan mit Lösche dra.
Wie, bie öich brönne scho d Strüüch?
Gueti Frau, mir hei ke Schlüüch!

„Hauptwach, Weibu, halbi vieri!
Was isch?! – Dass eine falsch parkieri?!
Meier! Schlück abe, hör uf sage!
Hopp hopp, mir näh dr Streifewage!
Stig ii, gib Gas, Blauliecht, Sirene!
Dört vorne, rächts, i glaub i gseh ne.

Du Cheib, blib stoh! Dir gohts a Chrage!
Mischt! S‘ isch dr ander Streifewage.

He lueg! Das Hus isch ganz zerschtört.
So öppis! Guet dass s nid üs ghört.
Wär spinnt und tuet es Hus zertrümmere? -
Mir chöi n is nid um alles kümmere!
Mir hei über Rueh und Ornig gwacht
Und weiss Gott gnue Stress gha die Nacht!

(Tatort Titelmelodie)

3 Kabinettssitzung

I länke mis Land mit Sachverstand und gschickter Hand!
S gmeinsame Wohl isch mis Idol das isch bekannt.
D Lüt säge: Silvio – oh – – Guet bisch Du do! – –
Silvio – oh – Guet bisch Du do! – kei Angscht mir wähle di scho!

I mir Republik hei alli Ethik und Redlichkeit!
Mis Kabinett isch bi mir im Dienscht immer bereit.
Si säge: Silvio – oh – – Muesch nomol cho! – –
Silvio – oh – Muesch nomol cho – oh, oh, oh, oh, oh!

Ah! Grazie Ragazze!

(Je t‘aime)

 

4 UBS

Nüt! Nüt isch passiert!
Nüt! Mir si nid kollabiert!
S isch verdaut. Dir heit s zaut.
S het Euch graut. Doch so isch s halt wenn me üs traut!
Nüt! Nüt isch passiert!
Nüt! Mir hei wider räntiert!
Vo öiem Gschtürm überchöme mer Würm.
Dasch doch deplaziert! – Jetz wird wider kassiert!

Einisch rächt spekuliert,
Paar mol scharf inveschtiert,
Immer guet lobbyiert
Und scho si mir saniert!
Und sött s einisch nümm go,
Rettet Dir üs jo scho
Üses Bisness isch geil:
Mir si too big to fail!

Nüt! Nüt isch passiert!
Nüt! Do wird nüt reguliert!
Dir tüet gäh. Mir tüe näh.
Ungeniert. Das isch, wie s funktioniert!
Nüt! Nüt isch passiert!
Nüt! Es lauft wider wie gschmiert!
Und üse Sinn, üses Credo,
Het üs nid verloh: D Boni si wider do!!!

(Je ne regrette rien)

5 Sunntig ir Einsiedelei

I has scho gwüsst, die Route do isch nüt für halbi Manne
Mit Chind und Hund und Tarnazug schliichsch bis zur erschte Tanne
Dr Bueb pack i i Rucksack und dr Fido i d Gamälle
Fido, gib Rueh! Dr Dechel zue, dass niemer di ghört bälle

I robbe liis dr Bach z düruf, dr Fido schmöckts und zitteret
Es Hundsskelett lit uf em Wäg, dr Schädel ganz versplitteret
E Schuelsack, brachial zerfätzt steckt under em ne Busch
Jetz Vollgas, ab! Im Schützesprung vo Baum zu Baum husch husch

Bim Spaziere im Waud (Sprung! Sprung! Sprung! Deckig!!)
Wirdsch hüt nümme aut (Sprung! Sprung! Sprung! Deckig!!)
Dr Schrecke wo s dim Hund drvor graut .... wohnt im Waud !!

Im Hechtsprung hindre Felse do, denn dört dr Hang uf tschettet!
I gseh scho s Ändi vo dr Schlucht! Dört vorne si mer grettet!
Hurra! Ha s gschafft, samt Chind und Hund! Si durecho! Chöi hei!

S isch früehner scho eifacher gsi: S Spaziere ir Einsiedelei.

(The Good, the Bad & the Ugly)

6 Ski-WM

E Dumebruch, zwöi quätschti Bei,
e Hutusschlag, e Galleschtei,
e Schprütze Kortison für d Chatz
e Blinddarm ohni Wurmfortsatz.

E Virus, es Bakterieviech
Staupe, Muul- und Chlauesüüch
Durchfall und im Darm chli Wind
E Härzrhythmus wo öppe spinnt

40 Grad Fieber, sturmi Bei, müede Schtei,
Bactrim, Eucalyptus, Valium, Grüentee, Gips und Hirsebrei
Läck mer, i wott hei!

Depressione, Glänk voll Roscht,
Fieber, Chötzle , Schüttelfroscht,
Spitzeblootre, Wanderniere,
Läberwärt wo kollabiere.

Dr Mage streikt, het Ferie
E Chnüppu ir Arterie
E Chnoche, wo is lottere chäm:
- - - D Schwizer a dr Ski-WM!

(Telefonbuchpolka)

 

7 Guttenberg
Karl Theodor Maria Nikolaus Johann Jacob Philipp Franz Joseph Sylvester Freiherr von und zu Guttenberg

D Frau Stefanie Freifrau zu Guttenberg frogt muff ihre „Von und Zu“:
Säg, Karl Theodor Maria Nikolaus Johann Jacob Philipp Franz Joseph Sylvester, sig ehrlich, wie gsehsch das Du:
Di Dokter isch flöte, hätsch halt müesse schalte,
Chöi mer wenigschtens dr Freiherretitel no bhalte?
Druf het ihre dr Karl Theodor Maria Nikolaus Johann Jacob Philipp Franz Joseph Sylvester zueproschtet
Jo klar, nur kei Angscht, dä het schliesslech gnue gkoschtet!

Doch Achtung , au mir si im Bschiisse versiert.
Die Pointe isch drum usem Google kopiert.

(Diplomatenjagd)

 

8 Arztpraxis

Zäh Paziänte heile mir komplementär
Bi Beibruch gä mir Änzian – das überläbt me schwär.

Dr nüünt Paziänt dä stoht uf Homöopathie
Füehrt d Globuli als Zäpfli i; Heiligschance chli!

Acht Paziänte hei mir Nöödeli verschribe.
Bim Grübel näh mer Lismernoodle – scho sis nur no sibe.

Dr Alex Oberholzer wett es ayurvedischs Gwächs
Mir gäh e Liter Rizinus – und scho sis nur no sächs.

Dr Müller Heinz wird mit eme Geischtheiler therapiert.
Dä Heiler findt dört zweni Geischt und het kapituliert.

Am Carlo Janka gäbe mir es Baldrian-Klischtier.
Druf chunnt sis Härz is flattere und de sis nur no vier.

Der Bundesrot üebt Hand uflegge zwäcks meh Harmonie
Eis blaus Aug und drei Rippibrüch – macht undrem Strich no drü

Als Räucherstebli brucht dr Peter Bichsel Gauloises bleu
Im Chrüz isch aber Rauchverbot und drum sis nur no deux.

Dir gseht, die Therapie würke schnäll und effiziänt.
Ab nöchscht Johr git s die allgemein – drum machet s Teschtamänt!

9 Armee

Alarm bi de Armeeabschaffer! Die gseh schwarz und rot.
S erscht Mol ir Gschicht isch d GSoA exischtänziell bedroht.
Sit vierzg Johr wird jetz proteschtiert, dr Füdlebürger gschreckt,
Traktätli gschribe, agitiert, ohni dr gringscht Effekt.
Die Amateur! E Profi schafft das zügig, churz und knapp!
Dr Ueli Murer Ueli schafft d Armee im Handumdräje ab!

(Si hei dr Wilhelm Tell ufgfüehrt)

10 Gipfelkreuze

S sig es Chrüz mit de Chrüz und drum müesse si wäg, uf Bärge, am Wäg und am Bach
Das fordere Freidänker-Gruppe gäng lüter, dr Glaube sig jedem si Sach.
Die Chrüz täge störe, chum luegsch nöime ane.
Au das Chrüz müess wäg uf dr Schwizrische Fahne.
Uf dr Stross hei die Fundis sich scho duregsetzt.
Drum wird jedi Chrüzig dur Kreisle ersetzt.

(Diplomatenjagd)

11 Guet Nacht (Kofmehl)

Dr Tag isch vergange, und s Stedtli bruucht Rueh.
Drum mache si s Kofmähl wenn s dunkel wird zue.
Die Gstörte chöi pfuuse, das passt üs komplett -
Jetz cha dr Kurt Fluri am sibni is Bett!

(I ghöre nes Glöggli ...)

 

12 Prophete

Vorfärn e Ospel – Schnitzelbank:
Schwupp, isch dä wägg gsi, gottseidank.
Färn es Gaddafi – Gedicht:
Au dä isch furt und nur no Gschicht!
Drum singe mir Euch noch und nocher
Dä Värs do übere Christoph Blocher.

(Ei du scheene ...)

13 Thilo

„Deutschland schafft sich ab“. Das schribt dr Thilo Sarrazin.
Vil Lüt si wäge däm ganz drab; gube em Thilo gärn Strychnin.
Si Partei, die gheit ne use, sini Fründ hei ne verloh.
Drbi isch die Idee doch Spitze! Thilo, Dütschland, witer so!

(Wecker)