Stedtlischiiisser

Schnitzelbänke siehe unten !

Schnitzelbänk 2010

1 Merz‘ Tröimli

I rite mit mim Kampf-Kamel quer dur d Sahara
Scho lütet dr Muhammar a: „Du chasch die Geisle ha!
Es tuet mir leid, s isch nur e Witz gsi, i ha d Schwiz jo gärn“.
I flüge im Triumphzug mit de Geisle hei uf Bärn.

S’isch jo nur es chlises Träumli gsi!

I stoh im Indianerchrieg, als Häuptling ‚Kahler Nerz‘
D Merkel stöhnt am Marterpfahl: „Mein Freund, es war nur Scherz!
Das deutsche Geld ist in der Schweiz genau am rechten Ort.
Und Kunden-Daten sind tabu!“ – I glaub‘ ere s sofort.

S’isch jo nur es chlises Träumli gsi!

I sitze bim Obama in, deheim im Wisse Hus
Mir handle bim ne Whisky schnäll dä UBS-Deal us.
I gib em no ne Fluchtgäld-Tipp, de bi n i hei zue jettet
Scho sitz i glücklech z Bärn am Pult. Das Bankgeheimnis isch grettet!

S’isch jo nur es chlises Träumli gsi!

I ha ir Zit als Bundesrot gäng gmacht, was i ha chönne.
Ha gchrampfet für e Härzkollaps – Bänzin gschprützt, wenn‘s tuet brönne.
Jetz tuet s es! I ha s guet gmacht und dr Stress loht jetz gli lugg.
I ha jo alli Ziel erreicht und tritte morn grad zrugg!

S’isch jo nur es chlises Träumli gsi,
D’Chance si do leider chli!

2 Spiel mir das Lied vom Tod

Stilli ! ---
Keis närvtötends Chindergschrei me !
Die schnatternde, chiflende Müetere si au nümm do.
Majeschtätisch kreist e n einsami Bärgchräje über de Ruine.
E verlotterete Fänschterlade giiret und dräjt sech im Wind.
S Skelett vom letschte Kurhus-Chällner bleicht i der Früehligssunne still vor sich hi.
Es Murmeli pfiifft ---

Wir haben viel erreicht! Gratulieren Sie uns! - Ihre Pro Sesseli!

3 D Fiir vo dr Stüürflucht

Mänge bringt Millione, was halt nid jede verschtoht.
Do i d Schwiz zu de Banke, will er sich uf se verloht.
Si bringe die Dollar und Euro vo überall uf dr Wält
Arm und Riich si willkomme, Hauptsach isch, si hei gnue Gäld.

Refr.
Das Gliir vo dr Stüürflucht macht üs truurig macht üs chrank,
Denn s Glück vo der Ärde isch dr Chlotz uf ere Schwizer Bank.
Drum isch d Fiir vor dr Stüürflucht fasch so heilig wie ne Mäss
Und s Ziel cha nur si: es Konto bir UBS.

Mängisch fühlsch du au Schmärze, wenn d Frau Merkel chli spöit
Mängisch trifft's di im Härze, wenn dr Sarkozy schreit.
D Stüürflucht könnt Höchi und Töifi, doch das git dr Liebi die Macht.
Solang üs dis Gäld blibt erhalte, liebe mir di Tag und Nacht.

Refr.
Die Gier nach der Stüürflucht stellt d Schwiz i Schattä vor Einsamkeit
Keis Land uf dr Ärde liebt üs no mit Zärtlichkeit.
Üses Füür für die Stüürflucht, das brönnt, macht Schwarzes Wiiss!
Mir streichle dis Gäld – he jo, es ghört jo scho fasch üs.

4 Die wüsten Söhne haben zugeschlagen!

Mir Wüeschtesöhn si stolz und schön
Zärtlech und toll und liebevoll …….

Wenn mir Putzfraue haue, denn weisch ganz genau: Dasch Amore! Nur Amore!
So ne Chöchin, e zarti, s isch klar, die verschwart‘ i – Amore!
Schloh-n-i dri (nur us Sympathie – meischtens muess es si), heisst das wörtlich „I ma di“!
Gschpürsch mi Fuscht, heb wäg däm ke Fruscht: Es isch nur us Luscht uf ne rächti Geradi.
Chunnt zu mir es Dienschtmeitschi, denn weiss i: Das peitsch‘ i – Amore!
Loht di Frau dir kei Rueh und du hesch grad nüt z tue, nimm dr Schueh!
Üsi Zärtlichkeit isch rauh, üsi Fraue si grüenlich blau, dasch scho wohr, heh!
Doch dir wüsst jetz, worum und drum näht s üs nid chrumm: S isch Amore!
Für die More! Amore! Für die More! Amore!

5 Ballermann-Knast: Zu allem fäh-ig

Dr Ballermann z Mallorca, dä zieht nümme.
Z Scharm el Scheikh gohsch nümm go schwümme.
S Nachtläbe z Phuket isch zweni heiss.
Ferieparadies git s nur no eis:

Wo isch alles offe? -- Im Schöngrüen!
Wo bisch dr ganz Tag bsoffe? -- Im Schöngrüen!
Wo wirdsch belohnt für s chlaue? -- Im Schöngrüen!
Wo findsch jungi, scharfi Fraue? -- Im Schöngrüen!

So wird e Chischte richtig gfüehrt!
So wird resozialisiert!
Dasch vom Strofvollzug dr Witz:
So wird jede Panzerknacker spitz.

Wo chasch gratis kiffe? -- Im Schöngrüen!
Wo wirdsch nie verpfiffe? -- Im Schöngrüen!
Wo wett jede sowieso hi? -- Is Schöngrüen!
Und dr Peter Fäh ghört wo hi? -- I Schache !!

6 E Grippe, wie se no nie hesch gseh

Z Basel bir Chemie bi dr Roche im Chäller
Produziert me pauselos.
Und dr Bundesrot tagt all Tag schnäller.
Im Krisestab isch d Panik gross.
Bir Armee git me Vire zum Abschuss frei,
D Grenadiere fasse ne Nasespray!
Doch lut Bundesamt sige d Chance chli,
No drvo z cho, --- bi der Pandemie!

Refr.
Do chunnt e Grippe, wie se no nie hesch gseh.
Wenn die chunnt, nützt kei Quarantäne meh.
De gits in Dänemark gli keini Däne meh - - - und ke Hyäne meh
Und au Rumäne, wo gähne, hei gli kei Migräne meh!

Jetz schnüz‘ i mi nur no i Ellboge
Vor jedem Stuehlgang wäsch i d Händ.
I gibe niemerem mi Pfote meh
Desinfiziere alli Wänd.
Verusse legg i Händsche und Mundschutz a,
Zum Zmittag git’s - Antibiotika.
Und i ha geschter die zwänzgischti Impfig gha.
--- --- Drum läng mi nid a!

Refr.
Will s chunnt e Grippe, wie se no nie hesch gseh.
Wenn die chunnt, nützt kei Quarantäne meh.
De gits ir Wüeschti de gli ke Hyäne meh - - - und keini Däne meh
Und au Rumäne, wo gähne, hei gli kei Migräne meh!

Und jetz wart i do scho wuchelang,
Doch ke Sau leit s mol is Bett!
Und i ha ghofft, dass möglescht d Schwigermueter
Oder mi Chef die Grippe het.
Au dr Krisestab isch ganz verstört
Will me niene es einzigs Hüeschtle ghört
Nur bir Novartis, dört isch me nid betrüebt:
Me weiss: Nöchscht Johr --- wird wider güebt!

Refr.
De chunnt de d Grippe, wo wider nie wirdsch gseh.
Mit em Tamiflu mache mir Gäld wie Schnee.
Was mir nid bruuche spände mer uf Afrika! - Das isch s Guete dra:
So wärde die ömu all Tag gäng chli öppis uf em Täller ha!

7 Grüzzi und Hallöchen

Behnke, Barthels, Borchert, Bayer, Brinkmann, Biermann, Birkenmaier,
Kretschmer, Krüger, Kunkel, Kern, Menzel, Münkel, Morgenstern,
Schlecker, Schleicher, Schlüter, Schlinger, Wessel, Wuhrmann, Wackelfinger
Starcke, Steinke, Strakuweit, Klöbner, Müller-Lüdenscheidt.

Radermacher, Rauschenbach – Wagendach – Wolfenbüttel Tulpenstengel
Lohmann, Lippert, Lauterbach – Fleischmann, Frühauf, Flach!

Lembke, Lübke, Ludendorff, Ehmke, Enders, Ekelschorf
Hartwig, Hamann, Heckmann, Henkel, Schulze, Schuhmann, Schröder, Schenkel,
Westphal, Wichmann, Wuselbauer, Rothe, Radtke, Rattenhauer,
Jahnke, Jacobs, Jselohr …. Mir läse nume s Zürcher Telefonbuech vor!

8 Eine Pippidromödie

Zum Baseltor us chum i ziemlich gleitig
Will i ha ne gewaltige Druck uf dr Leitig
Wo söll i au hi? Bi scho fasch nümm dicht!
Do ändlech chunnt mis globte Hüsli in Sicht

Refr.:
Oh, Rithalle – Klosett
Wo scho mi Grossätti brünzlet het
Du bisch mini Zueflucht nach allem Verdaue
Me sött di nur ändlech mol fertig baue !!

I tritte i – gseh, das Gschäft muess sich lohne
Scho s Interieur choscht beschtimmt Millione.
S wird gäng fliissig baut a mim Hüsli, mim holde:
Dr Heimetschutz tuet grad no d’Schüssle vergolde.

Refr.:

S Drögeler-Abwehrgschütz isch scho montiert
D Sälbschtspüel-Sensorik initialisiert
Bi so vil Wärtschetzig vo minere Sitzig
Do merk i: Nei die Stadt isch würklech nid gizig!

Jugenstil-Lüüchter und Marmor-Schale
Alls tuet i barockem Glanz erstrahle
Es winkt scho d Verdopplig vo r Gmeindsstüür-Lascht
Drfür hei mir gli e - Fäkal-Palascht.

9 Burkagebot

Em Sidi Boris Banga vo El Gaga
Het mol am Morge früeh uf nüechtre Maga
Im Hus vor Müll-Ablag
E Stimm gseit: „Guete Tag,
I wett mi is Regischter lo iitraga“

S isch Tochter gsi vom Muhammar al Furka
„I träge vo Geburt a nume Burka
Dä Schleier lüpf i nit.
E Foti? Das goht z wit!“
Dr Sidi Boris meint, dass ihn das gurk a.

E Ghüdersack cha n i nid regischtriere.
E Terrorischt chönnt s jo eso probiere.
E Taliban e stränge
Chönnt do cho öppis spränge!
(Wobi dä zwar nid vil chönnt ruiniere).

Dr Kadi het dr Richtspruch gfällt – ke feige!
Vorem Gricht in Strossburg tüe mir üs verneige.
Die Frau het nämlech Rächt:
S isch gäge d Mönscherächt,
Sich unvermummt in Gränche müsse z zeige!

10 Poller

I bi vo Chopf bis Fuess uf Schwärvercher fixiert
Für das bi n i montiert – und süsch gar nüt!
Mi Lengi und Stiifigkeit si Norm-spezifiziert,
Im Labor usprobiert, süsch lauft gar nüt.
Wenn eini meint, do wird no husch husch ine blocht
De blinkt s rote Lämpli und – schwupp – scho isch si glocht.
I ha jetz jedi Nacht paar Chassis perforiert
Für das bi n i montiert und süsch gar nüt!

All Nacht hoffe Hunderti druf, dass es funktioniert
Süsch wird grad proteschtiert, i chöm noni.
Sie gseh wie s mi liftet und si völlig fasziniert
Wie s dank mir reguliert, das verstoh n i.
Zwar, älteri Schwarte spiess i nid so gärn uf
Doch es jungs sprützigs Truckli, jo do stürz i mi druf.
Mis Vorbild isch dä, wo Italie regiert:
I bi schnäll stimuliert, und de stoh n i !

11 Brot etc.

- I chume äxtra gäng i d Stadt wägem Brot.
Will i so ne schwarze Cheib vom Müller-Beck wott. (I love it)
Jede Samschtig bloch i mit mim Subaru i d Stadt,
Und mache scho im Buechibärg paar Hünd und Hüehner platt.

Ou, o-o-oh-o-ou, o-o-o-oh-o-ou !
- Ir Vorstadt nach em Kreisel chunnt e Kreisel chunnt e Kreisel chunnt e
Ou, o-o-oh-o-ou, o-o-o-oh-o-ou !
- chunnt e Kreisel chunnt e Kreisel chunnt e Kreisel chunnt e Kreisel

Immer mi! Immer mi! Mi liiret s um dä Lotterkreis!
(Nach fünf Metern in den Kreisverkehr einfahren!)
Är dräjt rund! Är dräjt rund! Doch es Ändi wott er keis!
(Nach vierzig Runden bitte wenden!)

- I briche us und düse rächts Richtig Brügg
Shit, s het e Kolonne, s staut vom nöchschte Kreisel zrügg
Flueche, hupe, tuusig PS, alles isch für d Chatz:
S Bipperlisi schnoogget fröhlech übere Bahnhofplatz

Spräng dä Cheib! Spräng dä Cheib! O spräng das Lisi ab em Schottergleis!
(Jetzt Lunte in Sprengkapsel einfahren !)
Jetz isch gnue! – Jetz isch gnue! Chumm, mir packe und verschrotte eis!
(Nach der Sprengung Schrotthaufen links umfahren!)

I freese Richtig Baseltor und ha scho wider Stau.
Dr Stau goht bis i Kreisel, will d Parkhütte isch vou.

Ou, o-o-oh-o-ou, o-o-o-oh-o-ou !
E Gump zum Chare us – i seckle Richtig Brot.
Ou, o-o-oh-o-ou, o-o-o-oh-o-ou !
I springe ine – vor si s Gitter abe loht!

I ha s gschafft! I bi do! I stoh im Lade - aber Brot het s keis!
(S Letschte isch vor föif Minute gange !)
Grauehaft! I bi do! I stoh im Lade - aber Brot het s keis!
(Darf s süsch no öppis sii ??!)